Møre og Romsdal fylkeskommune har definert sambandet Eidsdal–Linge som beredskapssamband etter ønske frå Helse Møre og Romsdal. I eit beredskapssamband er det mannskap om bord i dei timane på natta når ferja ligg still, slik at naudetatar kan rekvirere ferja ved behov. Ved beredskapsturar på natt, må mannskapet arbeide i den tida som er fastsett som kviletid. 

Fjord1 er operatør på sambandet og har søkt Sjøfartsdirektoratet om dispensasjon frå kviletidskrava, men i slutten av desember fekk dei avslag på søknaden.

Kan føre til innstillingar

Avdelingssjef i FRAM i Møre og Romsdal fylkeskommune, Stig Helle-Tautra, opplyser at dette gjer at viss ferja får beredskapsturar på nattetid framover, kan dette føre til innstillingar påfølgande morgon.

– I vinterhalvåret er det gjennomsnittleg to beredskapsturar per månad som blir gjennomført på nattetid. No jobbar vi saman med Fjord1 og beredskapsaktørane for å få på plass løysingar   så snart som mogleg, seier Helle-Tautra og fortset:

– Både beredskapen og passasjerane må ivaretakast, men vi må også overhalde kviletidskrava frå Sjøfartsdirektoratet. Fram til ei løysing er på plass, må vi derfor førebu passasjerane på moglege innstillingar.

Helle-Tautra oppmodar dei som nyttar ferjesambandet om å melde seg på sms-varsling frå Fjord1 slik at dei får melding om eventuelle innstillingar. 

– Vi gjer alt vi kan for å minimere dei negative konsekvensane dette kan få for passasjerane våre. Innstrammingane rammar også fleire samband langs heile kysten, ikkje berre i Møre og Romsdal.

Gjer ikkje lenger dispensasjon

I skipssikkerhetsloven er det fastsett at kviletida for mannskap minst skal vere 10 timar i løpet av ein kva som helst periode på 24 timar. I beskytta farvatn kan kviletida delast opp, men kravet er minimum 6 timar kvile i den eine av periodane. Det er dette kravet Sjøfartsdirektoratet tidlegare har gitt beredskapssamband dispensasjon frå, men som dei no altså strammar inn.